要離開一個生活咗咁耐嘅城市，相信一啲都唔容易。每個人都有唔同嘅故事，但相信最主要嘅原因都係一致嘅。近年，英國政府推出低門檻嘅BNO Visa 5+1移民計劃，令更多香港人移民英國，熱門港人聚居地有倫敦、伯明翰同曼徹斯特。本篇就以我哋自己嘅經驗，同大家分享喺抵達英國後，step by step要喺英國處理嘅20件事！
BNO Visa 5+1移民計劃背景
2021年1月31日起，持有英國國民（海外）護照（BNO）嘅香港居民，就可以申請BNO Visa，居住滿5年後，就可申請永久居留權。獲得永久居留權身份1年之後，就可申請正式入籍為英國公民。BNO持有人可攜同無BNO嘅仔女、父母、伴侶，以受養人嘅身份一齊以BNO Visa 5+1計劃移民英國。此外，BNO亦正進行唔同嘅平權安排，遲啲97後無BNO嘅人，或者可以用個人身份申請BNO Visa 5+1移民計劃。
1. BNO Visa移民 – 抵達英國後：調整心態
同上篇一樣，第一件事要做嘅就係調整心態！因為嚟到英國之後，你嘅社會地位同工作職級，可能都要重新建立，加上喺英國嘅朋友唔多，所以要調整一吓自己嘅心態喇！
另外，以前喺香港，香港人嘅效率其實真係好高，做任何事情都好快手。但嚟到英國之後，所有人嘅步伐都放慢咗…好多…好多…好似我哋一到埗嘅時候，前後入住咗兩間位於倫敦嘅萬豪酒店，作為五星品牌嘅酒店，我哋真係無諗過喺夜晚十點打去攞沖涼液，結果第二朝八點先送到嚟。如果喺香港發生呢啲事，我諗1個鐘都未見支沖涼液，相信有唔少人已經拍枱投訴喇！所以大家真係要調整心態，習慣英國人呢種慢活嘅生活同工作模式。
2. BNO Visa移民 – 抵達英國後：領取BRP
如果申請BNO Visa 5+1移民計劃嘅時候係喺北角簽證中心申請，咁你到達英國之後就要領取全稱Biometric residence permits嘅BRP，即生物識別居住證，表示你未獲得英國護照前，但有居住喺英國嘅資格。Home Office會根據申請BNO Visa時所填寫嘅英國地址，將BRP送到就近嘅郵局。到時只要出示確認信同護照，就可以去郵局領取BRP。
3. BNO Visa移民 – 抵達英國後：申請PRC （網址：www.gov.uk）
PRC全稱係Police Registration Certificate，即係警察登記證明，以證明你符合簽證要求。申請PRC只限持特區護照申請BNO Visa 5+1移民計劃而沒有被豁免嘅人士，咁就需要喺入境英國後嘅七日內，預約時間再去當地警察局登記及報到。報到時你需要準備護照、兩張護照相片、BRP（如有）、簽證確認信、地址證明、工作或學業證明等，以及註冊費用£34，完成申請之後會收到PRC喇！其實要唔要去報到，主要留意簽證文件入邊，有無顯示“Police registration within seven days of arrival” 或“Report extension to the police”喇！
4. BNO Visa移民 – 抵達英國後：申請Share Code （網址：www.gov.uk）
Share Code，全稱係Immigration Status Share Code。Share Code嘅用途係用嚟打擊黑工，亦方便僱主同地產中介去了解你嘅身份狀態同居英權利。大家只要去政府嘅官網，輸入簡單嘅個人資料，你就會獲得一個Share Code。Share Code嘅有效期只有30日，以保障你嘅個人資料，所以當你需要用嘅時候，先上網申請，再將Share Code發送俾你相關嘅機構。
5. BNO Visa移民 – 抵達英國後：買樓租屋
有唔少人可能想喺出發前買定樓或租咗樓先，網上就有唔少agent會幫大家睇樓，仲會現場直播或拍片俾你睇。不過呢個service收費唔平，而且亦都聽過一啲唔好嘅經歷，所以大家一定要搵啲口碑好嘅agent代為睇樓呀！而我哋就覺得，都係親眼睇就最好，因為仲可以了解到唔同區嘅特點。我哋就試過一落車就發現該區嘅環境同治安麻麻，呢啲都係睇樓agent唔會話你聽嘅事情。
我哋嚟咗英國之後，透過Rightmove網上搵租盤。大家如果都係經Rightmove搵租盤或買樓，建議直接打電話聯絡，如果用email嘅話， 99%係唔會有人回覆。至於多個熱門嘅移居城市，好嘅租盤都會一閃即逝，所以搵樓嘅過程一啲都唔容易。終於搵到適合喇，又會有好多人同你爭，所以如果你未有工作嘅話，有唔少業主會即時reject你，有啲就要求你預繳一年或半年嘅租金呢！
睇樓嘅時候，大家不妨留意一吓啲水電情況，例如試吓開燈，試吓啲水喉。簽約嘅時候，可以要求業主或agent搵清潔公司做professional cleaning。另外，如果上手有大型垃圾留低，記住叫業主或agent預先清理，因為清理大型垃圾係要收費，我哋作為過來人，就俾呢件事煩咗好耐。最後，收樓嘅時候，記住睇清楚單位入邊所有瑕疵或問題，因為有啲小問題，業主未必會維修，但到你搬走嘅時候，業主有機會因為呢啲問題扣你按金㗎！
6. BNO Visa移民 – 抵達英國後：登記GP （網址：www.nhs.uk）
成功入住之後，就可以登記GP。GP嘅全稱係General Practitioner，即係你嘅家庭醫生。每個人可以根據自己居住嘅地區，選擇該區嘅家庭醫生。而視乎各個GP嘅登記要求，可能係透過電話、親身或網上登記。登記前，可以先Google一吓GP嘅口碑，同留意NHS上面嘅Review，因為除非搬屋轉地址，否則呢個GP會一直跟住你㗎！
至於喺收費方面，我哋喺申請BNO Visa 5+1移民計劃嘅時候，已經俾咗一個叫IHS嘅移民醫療附加費，所以睇醫生係免費，但配藥就要收費！另外，睇醫生係需要提前預約，快則5日先book到睇醫生，所以大部份人都係去藥房買成藥就算，至於急症嘅話，就會直接去醫院嘅急症室。
7. BNO Visa移民 – 抵達英國後：登記NHS
NHS嘅全稱係National Health Service，即係英國公營醫療服務機構。由於我哋申請BNO Visa嘅時候，已經俾咗一個叫IHS嘅移民醫療附加費，所以NHS提供嘅大部份服務，例如急症服務、住院服務、家庭醫生門診都唔會再有額外收費。
而大家喺成功登記GP後，你就會收到一個NHS number。之後，大家可以經NHS app預約打針或其他醫療服務。另外，獲得NHS number之後，就可以登記牙醫，雖然牙醫要另外收費，但價錢比私家診所收費平。
8. BNO Visa移民 – 抵達英國後：登記NI （網址：https://www.gov.uk/national-insurance）
NI嘅全稱係National Insurance，即係社會保險，主要係用嚟紀錄大家嘅交稅情況。當大家入籍之後，政府就會根據你嘅NI記錄，決定你嘅退休福利有幾多。登記一啲都唔複雜，只要上網就輕鬆搞掂，到大家返工出糧嘅時候，公司就會要求你交NI號碼。
9. BNO Visa移民 – 抵達英國後：登記做選民 （網址：www.gov.uk）
喺英國每個人都有一個Credit Score（信用評級），如果評分低，會申請唔到信用卡，做唔到按揭買樓，業主甚至唔會租樓俾你。要提升Credit Score有好多方法，其中一個就係登記做選民。只要年滿18歲及合法居住喺英國嘅居民，就可以到政府網站登記做選民喇！
10. BNO Visa移民 – 抵達英國後：繳交Council Tax
無論你住邊一個區，都有一個Council，Council負責地區小學、地區中學、收垃圾、回收垃圾同圖書館等社區服務。無論你有無返工，都要交Council Tax！每個區域收費都唔一樣，有啲區會貴啲，有啲就會平啲，仲會根據你居住嘅地方分唔同級別收費。大家安頓咗，有住址之後就記住去你嘅Council官網交Council Tax費用。
11. BNO Visa移民 – 抵達英國後：申請水、電、煤、Wifi
水：供應商係按地址劃分，入伙後只需要知道係邊一間供應商，然後去番供應商嘅網頁登記就得！有唔少新型大廈，水費會計埋落大廈管理費入面，咁你就唔需要另外登記水費喇！
電、煤氣：電同煤嘅供應商好多，大家可以比較價格、服務費、合約期等各種優惠。費用主要分為固定收費或標準浮動：固定收費係指電費價格不受市場嘅能源價格波動，固定一個收費價錢，但能源下降時，使用固定收費用家就要繳付較多電費；標準浮動係因應市場上嘅能源價格可加可減機制收費。
Wifi：Wifi嘅供應商同樣好多，市中心嘅網速比較快而且選擇較多。相反郊區就會比較慢同選擇少。我哋選擇供應商嘅時候，上網睇評價發現好壞參半，唔知點揀好。結果我哋嘅方法係問鄰居，決定咗用Hyperoptic Broadband上網。另外，部份嘅Wifi供應商仲會郵寄一個wifi Router俾你，非常方便！
12. BNO Visa移民 – 抵達英國後：下載生活常用app
無論你係用Apple定Android，要download英國嘅app都要轉地址，否則你係唔會search度英國嘅app㗎！但你哋可以放心，轉咗地址後，大部份香港download嘅app，特別係銀行app都唔會受影響。
私心推介嘅英國生活常用apps：
Trainline：買火車飛
Citymapper：同google map相似，英國人較常用呢個apps睇車程同車費。住倫敦嘅朋友，亦可於購買周票任搭嘅Citymapper Pass
Trolley：超市格價apps
Waitrose、Lidl、Tesco、Nectar、Morrisons、M&S、Boots、Superdrug等品牌：儲分會員apps
Shopmium：免費或以優惠價錢換購食物同試用品
HUYU：只要將超市收據上載，就可以獲得積分，達到一定積分，就可以兌換現金券
13. BNO Visa移民 – 抵達英國後：繳交TV Licence
喺英國睇電視係要俾TV Licence（電視牌費），收費為£159一年，無論屋企有幾多部電視，只需要繳交一次TV Licence就得。如果被發現無TV Licence觀看、錄製或下載電視節目，最高罰款為£1,000，更可能被要求支付任何法律費用或賠償。但如果只係睇Disney +、Netflix、Amazon Prime等已付費嘅串流平台，就唔需要繳交TV Licence喇！
14. BNO Visa移民 – 抵達英國後：更換英國車牌 （網址：www.dvla.gov.uk）
強烈建議，如果未有車牌嘅，先喺香港考定車牌，因為英國考車牌真係非常難，而且價錢亦都貴好多！
英國同香港有車牌互通協議，所以只要持有香港嘅駕駛執照，喺入境英國嘅第一年內，唔需要國際車牌，亦唔需要轉換成英國車牌，都可以喺英國合法駕駛。至於入境半年之後，你亦可以經英國Driver and Vehicle Licensing Agency（DVLA）進行換牌手續，無需另外再考試。只需登入DVLA （Driver and Vehicle Licensing Agency）列印D1表格，連同Share Code、換牌支票、證件相、護照副本、香港駕駛執照正本、駕駛執照細節證明書等寄回DVLA，就可以收到英國車牌，但留意香港車牌將不會被發還。
15. BNO Visa移民 – 抵達英國後：開辦銀行戶口
喺香港，唔少人會申請定離岸戶口或綜合戶口，例如HSBC UK、HSBC One或Citibank Plus。但除咗HSBC UK之外，另外嗰兩個戶口，都唔屬於英國當地嘅銀行戶口，所以出糧或交租並不能使用。 而且英國人日常習慣用Debit Card（扣賬卡）作一般消費、網上購物同搭車等，消費即時扣賬，部份Debit Card仲有消費回贈添！
英國嘅主流傳統銀行包括Barclays、Lloyds、NatWest、HSBC等；至於主流虛擬銀行就包括Chase、Revolut、Starling Bank、Monzo等。申請戶口一般需要身份證明文件（護照、學生證明等）、地址證明同英國電話號碼。 各家銀行都有特色，我哋就比較常用Chase，因為Chase嘅活期存款利率高達1.5%，有時仲有推廣優惠，存款利率甚至高達5%。至於，用Chase嘅Debit Card消費，更可以獲得高達1%現金回贈。整體嚟講，都比其他銀行為高，所以屬於我哋私心推介！
16. BNO Visa移民 – 抵達英國後：申請信用卡
信用卡係一件非常矛盾嘅事，因為準時繳交信用卡費用，係會提升你嘅Credit Score，但你要有良好嘅Credit Score，先會成功申請到信用卡。所以我哋就要搵一啲相對容易申請成功嘅信用卡！ 其中HSBC嘅Classic Credit Card無年費，只要有穩定嘅工作收入，基本上都會成功獲批，不過呢張卡除咗免年費之外，就無乜好處，主要都係用嚟俾你儲Credit Score。另外，如果你喺香港係American Express信用卡嘅會員，就算未有工作，都可以透過AE Global Transfer嘅機制，利用香港嘅信貸紀錄申請英國信用卡。由於英國嘅信用卡無香港咁大競爭，所以回贈同迎新都無香港咁多同咁吸引，所以我哋建議初到埗時，主要申請免年費嘅信用卡。
17. BNO Visa移民 – 抵達英國後：申請英國電話卡（網址：www.giffgaff.com）
喺香港最方便申請到嘅英國電話卡就係Giffgaff，Giffgaff會將電話卡免費寄到去你香港嘅地址，咁飛機一降落，就可以有一個英國嘅電話號碼啦，無論接聽、致電同上網都非常方便。 不過，我哋住嗰區用Giffgaff真係收得好差，所以嚟到之後，就需要轉會喇！英國電訊公司有好多選擇，例如EE、Vodafone、O2、Three、Giffgaff等，除咗合約月費，仲有彈性月費同按容量使用收費。大家喺申請前一定要確認供應商嘅訊號覆蓋率，最佳嘅方法就係問吓鄰居嘅用家情況喇！
18. BNO Visa移民 – 抵達英國後：申請圖書證
呢度嘅圖書館由Council負責，唔同Council會有唔同嘅圖書證，申請圖書證係免費嘅，但預約圖書、遲還圖書就會有收費嘅！圖書館除咗有大量英文書之外，仲有中文書，視乎你嘅圖書館大細，有啲圖書館嘅中文藏書多達10,000本㗎！ 另外，喺圖書館亦都會有唔同嘅活動，例如由Council舉辦嘅免費英文課程，都會喺圖書館進行。所以想了解同參加最新嘅活動，不妨去吓圖書館啦！
19. BNO Visa移民 – 抵達英國後：搵工
當你安頓好之後，你就需要搵工喇！英國的大城市，例如倫敦及曼徹斯特，對於金融業、銀行業、客戶服務、餐飲服務、法律、管理、營銷等嘅人才需求較大；至於細城市，例如伯明翰、諾丁漢等就對機械、工廠、貨倉、工程、能源等嘅人才需求較大。
英國有唔少求職網站，例如：Indeed、Monster、Totaljobs、Reed、CV-library、Glassdoor、Find a job、Adzuna等。但大部份文職同管理層嘅工作，僱主或中介公司都會睇你嘅Linkdin再聯絡。喺英國有唔少求職陷阱，例如有啲公司知道你係新移民，會特登壓你人工，甚至低過政府法律規定嘅最低工資添。最後我哋祝大家盡快同成功搵到一份理想嘅工作。
20. BNO Visa移民 – 抵達英國後：搵學校
我哋雖然無小朋友，但知道搵學校係唔少家庭嘅一大難題！因為喺英國租樓買樓一啲都唔容易，當你搵到間合心水嘅靚屋，又要兼顧校網同屋企附近嘅學校有無學位。因為英國公立學校係以住址距離為收生標準，你可以喺Compare School Performance政府網站輸入Postcode，了解25公里範圍內嘅學校學位情況、學校類型、宗教背景、Ofsted 評核報告了解學生成績等，資料非常詳盡。
資料來源：A姐M佬 玩樂日記
